اصنعي عالمك الخاص
كتبت/ شمس فتحي
اصنعي عالمك الخاص عشان لما يدخل عالمك يحس إنه دخل الجنة مش دخل بيت فاضي مستنيه هو اللي يفرشه
أكبر غلطة بتعمليها في حق نفسك إنك تخلي راجل هو عالمك كله.. تصحي تفكري هيكلمك ولا لأ، تلبسي عشان رأيه، تخرجي عشان مستنياه، تزعلي عشان اتأخر، وتفرحي عشان قال كلمة حلوة.. فجأة تلاقي نفسك بقيتي نسخة باهتة، مفيش فيها انتي.
والراجل عمره ما بيحب الست اللي معندهاش عالم. الراجل بينجذب للست اللي عندها حياتها.. الست اللي ليها دنيتها الخاصة اللي هو نفسه بيبقى عايز يدخلها.
بس قبل ما يكون ده عشان تجذبيه.. ده عشانك انتي
قبل ما يكون عشان حبيبك أو زوجك يفضل جنبك، هو مهم ليكي انتي عشان نفسك.
عشان لما تبصي في المراية تشوفي واحدة قوية وليها قيمة مش مستنية حد يديها قيمتها. عشان لو الدنيا كلها سابتك، تفضلي واقفة على رجلك وعالمك شايلك ومنور بيكي. انتي مش محتاجة راجل يكملك، انتي محتاجة راجل يشاركك عالمك الحلو اللي انتي بنيتيه لنفسك.
اصنعي عالمك الخاص
ارجعي لنفسك
فين هواياتك؟ فين الحاجات اللي كنتي بتحبيها قبل ما هو يدخل حياتك؟ قراءة، رسم، جيم، كورس نفسك تاخديه، شغل بتحبيه.. ارجعي اعملي حاجة بتحبيها لنفسك انتي وبس. الست اللي عندها شغف.. شغفها بينور وشها.
خلي عندك مصدر فرحة غيره
متخليش فرحتك كلها متوقفة على رسالة منه. اخرجي مع صحابك، اضحكي من قلبك، اشربي قهوتك في مكان بتحبيه، اشتري لنفسك ورد. لما يكون ليكي مصادر سعادة كتير، مش هيقدر يتحكم في مودك ولا هيشوف دموعك كل شوية.
مش متاحة طول الوقت
الست اللي فاضية 24 ساعة وماسكة الموبايل مستنية.. بتخوف. الست اللي عندها يوم مشغول ومش بترد بسرعة عشان بتعمل حاجة بتحبها.. بتجنن. مشغوليتك بنفسك هي اللي بتخلي ليكي قيمة وهيبة.
استثمري في دماغك قبل شكلك
شكلك الحلو هيشد عينه أول مرة، لكن عقلك وعالمك هو اللي هيخليه يفضل. اقري، اتعلمي، اسمعي، اتثقفي.. خليكي الست اللي القعدة معاها متتزهقش.
طول ما انتي شايفة نفسك محور حياته هتفضلي تعبانة لكن أول ما تخلي نفسك انتي محور حياتك هو هيلف ويدور ويرجع يتمنى يكون محور حياتك
