بدعة ولا مش بدعة كفاية خلاف… نتكلم عن الأهم

بدعة ولا مش بدعة

كفاية خلاف… نتكلم عن الأهم

بقلم/ شمس فتحي

كل سنة في نفس المعاد بنرجع لنفس الجدال العقيم.
“يجوز ولا ما يجوزش”
“بدعة ولا مش بدعة”
ونسيب الأصل ونمسك في الفرع

الاحتفال بمولد سيدنا النبي ﷺ مش إساءة للدين
ولا جريمة نجلد بعض عليها

احنا كعرب وشرقيين ارتبطت فرحتنا بالمناسبات باللمة وبالحلاوة
فبقت الحلوى في المولد مش أكل… دي رسالة بهجة
طريقة بندخل بيها الفرحة على قلب عيالنا في يوم استثنائي

خلاص بقى سيبكم من “أصلها اتعملت امتى”
ومن “فلان مع ومن فلان ضد”

*اسألوا نفسكم سؤال واحد: احنا محتاجين ايه دلوقتي؟*
محتاجين نعرف عيالنا مين هو محمد ﷺ
محتاجين نرجع نحكي عن أخلاقه اللي اتهزت قدامها الجبال
عن صدقه. عن رحمته عن حياته اللي هي دستورنا

احنا في زمن الفتن فيه بقت زي المطر.
زمن بقى القابض على دينه كالقابض على الجمر
زمن عيالنا بيتوهوا فيه بين التيك توك والالعاب وبين الشبهات

فبدل ما نضيع اليوم ده في خناق
تعالوا نحوله لطوق نجاة

*اقفلوا النت. اقفلوا التليفزيون. وافتحوا كتاب السيرة.*
لموا عيالكم واحكولهم
قولولهم مين اللي بنصلي عليه كل يوم.
قولولهم ازاي كان بيتعامل مع مراته، مع جاره، مع عدوه
ازاي كان رحيم ازاي كان قائد، ازاي كان إنسان

يمكن الكلمتين دول يكونوا سبب ان شاب ضايع يرجع
سبب ان بيت مفك يلم شمله
سبب ان قلب متذبذب يثبت

الخلاف مش هيبني أمة
لكن السيرة هتبني أجيال

فكفاية ضياع وقت في اللي يفرقنا
وتعالوا نستغل اليوم العظيم ده في اللي يجمعنا
في غرس حب النبي ﷺ وعقيدتنا في قلوبنا وقلوب أولادنا

*الهدف أكبر بكتير من الخلاف*
اللهم صل وسلم وبارك على سيدنا محمد ﷺ 🌙