احصد ماتزرع
كتبت / شمس فتحى
العلاقات مش بتقع مرة واحدة
العلاقات بتتاكل بالبطيء
بتموت حتة حتة
مع كل كلمة ناشفة بتتقال
مع كل موقف بيتعاد ومحدش بيصلحه
مع كل مرة الست بتحس فيها إنها هوا موجودة بس مش متشافة
خليك عارف
إنت اللي في إيدك تخلي بيتك هو المكان اللي بتجري عليه في آخر
اليوم مكان فيه دفا وسند وراحة
وفي ايدك برضو تخليه أكبر مصدر قلق وتوتر في حياتها
لما تحترمها
هتلاقي إحترامها ليك بيزيد الضعف
لما تطبطب عليها وهي موجوعة
هتلاقيها أول واحدة واقفة في
ضهرك وقت شدتك
لما تقدر تعبها وتقدرها
هتديك من قلبها ومن غير ما تحسبها
لما تحسسها انها غالية ومهمة
هتعمل المستحيل عشان تحافظ عليك وعلى بيتكم وعلى اللمة
لكن
لما لسانك يبقى فيه تجريح
ولما التجاهل يبقى هو ردك الدايم
ولما الخصام يبقى هو سلاحك في العقاب
أوعى ساعتها تستغرب لما تلاقيها إتقفلت وإتغيرت
الست مش بتقلب كده فجأة
الست بتتغير بالتراكم
موقف ورا موقف
كلمة بتوجع بتتخزن
تجاهل بيخليها تسكت مرة
وإتنين وتلاتة
لحد ما الطاقة بتخلص ومبقاش
عندها حاجة تديها
وفي الآخر
إنت بتحصد اللي زرعته ب إيدك
في بيتك
لو زرعت حنية وإحترام وأمان
هتحصد حب وونس وسكينة
ولو زرعت قسوة وخوف وإهمال
هتحصد بيت ساقع حتى لو إنتو
الأتنين عايشين في نفس الشقة
البيت مش بيتعمر بالفلوس
ولا بالعفش الجديد
البيت بيتعمر بالمعاملة
الإحترام بيولد حب
والحنية بتصنع أمان
والأمان هو اللي بيخلي العلاقة
تكمل وتعيش
فخلي بالك من كل كلمة وكل تصرف
مع مراتك
لأن اللي هتزرعه فيها النهاردة
هتلاقيه راجعلك بكرا في وشها
وفي معاملتها وفي بيتك كله
