بس محتاجة صيانة
كتبت /شمس فتحى
مش عشان اتجوزت ست كويسة يبقى ضمنتها للأبد
في الأول بتلاقيها مستنياك
مهتمة بيك
بتقلق عليك
بتحب قعدتك
بتسندك
وبعد سنين تلاقيها سكتت
بطلت تسأل
بطلت تعاتب بطلت تغير
قبل ما تقول “هي اتغيرت ليه” اسأل “أنا عملت ايه وصلها لكده؟”
أحياناً هي متغيرتش هي بس تعبت
كانت بتتكلم فـ استهزأت بيها فسكتت
كانت بتطلب وقتك فـ فضلت الموبايل فبطلت تطلب
كانت بتغير فـ قولتلها نكدية فبطلت تسأل
كانت بتصالحك فـ استغليت ده فـ في يوم مبقتش تيجي
الهدوء مش دايماً راحة
ساعات بيكون استسلام
أخطر حاجة مش الخناق
أخطر حاجة براحتك
لما اللي كانت بتعاتب
وتتحايل تقولك “مش فارقة”
ده معناه إنها تعبت من المحاولة
مش إن المشكلة اتحلت
متطلبش منها اللي مش بتدهولها
عايزها هادية وانت كله صراخ؟
عايزها حنينة وانت بجفا؟
عايزها تحترمك وانت بتقل منها؟
عايزها تثق وانت بتكذب؟
اللي بتزرعه هو اللي هتحصده
الست الكويسة رزق بس محتاجة صيانة
الحب زى البطارية بتحتاج شحن محتاج كلمة طيبة تقدير احترام أمان
ربنا قال: ﴿وَعَاشِرُوهُنَّ بِالْمَعْرُوفِ﴾
والعكس صحيح برضو*
مش كل تغيير سببه الراجل
وفي رجالة برضو اتغيروا من كتر الإهمال
المسؤولية على الاتنين
ومفيش مبرر للأذى أو الخيانة
حنيتها مش هتفضل من غير تغذية وصبرها ليه آخر
قبل ما تقول “مراتي اتغيرت” راجع انت كنت عاملها ازاي.
يمكن النور ماطفاش مرة واحدة
يمكن فضل يقل لحد ما ضل.
الجواز اختيار + محافظة اختار صح… وصون اللي اخترته
