ماكنتش بدور عليك بس بقيت كل حياتي

ماكنتش بدور عليك بس بقيت كل حياتي
بقلم/شمس فتحى

أجمل العلاقات مش دايما بنكون
بندور عليها
أحيانا بتدخل حياتنا بالصدفة من غير تخطيط ولا مواعيد ولا حتى توقعات
بنقابل ناس كتير في يومنا وبنعدي
على حكايات كتير وفجأة يظهر شخص واحد بس يقلب كل الموازين

في الاول بيكون عادي كلام بسيط ضحكة موقف صغير
وبعد وقت قصير جداً بنكتشف حاجة غريبة
إن القلب ده كان ناقصنا من زمان
وإن الايام اللي فاتت من غيره كانت ناقصة حاجة احنا مش عارفين نسميها

ما كنتش بدور عليك
ما كنتش بدور على حد يملا وقتي
ولا يشاركني تفاصيلي
كنت ماشية في طريقي
وراضية ومش مستنية حاجة

بس دلوقتي؟
دلوقتي مش متخيلة يومي يبدأ
من غير رسالتك
مش متخيلة اخد قرار كبير من
غير ما اسمع رأيك
مش متخيلة بيتي يبقى هادي
من غير دوشتك ولا قهوتي ليها طعم من غير ما نشربها سوا
بقيت بتفاصيلك جزء من روتيني
ومن دعائي، ومن خططي لقدام

العلاقات الحقيقية مش بتيجي
بالسعي المحموم ولا بالبحث
بتيجي بالراحة بالامان اللي بتحسه وانت ساكت
بالشخص اللي يفهمك من نص كلمة ويطبطب عليك من غير ما تحكي

بتيجي لما تلاقي حد يخليك احسن نسخة من نفسك من غير ما يطلب
حد يفرح لفرحك ويشيل معاك الزعل
حد وجوده لوحده يبقى رزق

عشان كده لو لقيت الشخص ده
في حياتك امسك فيه

قوله “انا محظوظ بيك” كل يوم
احتفل بيه في التفاصيل الصغيرة
لان فيه ناس بتدخل حياتنا صدفة
وبيطلعوا هما القدر كله، والبيت كله والعمر كله