إخلقوا لأنفسكم منافذ أخرى
كتبت/شمس فتحى
كام مرة علقتي سعادتك على رد؟
كام مرة نومك باظ عشان كلمة؟
كام مرة حسيتي إنك مخنوقة عشان مستنية حد؟
الحقيقة المرة لما بتحطي كل حياتك في إيد شخص بتديه ريموت حياتك
إخلقوا لأنفسكم منافذ أخرى للحياة بعيدة كل البعد عن الأشخاص ده حديث لى ولكل إمرأة
المنفذ مش أنانية المنفذ نجاة
مش بقولك اقطعي الناس بقولك متبقيش متعلقة بيهم 100%
المنفذ هو الحتة اللي بتهربي لها لما الدنيا كلها تقفل
هو الحتة اللي محدش يقدر يقفلك بابها
المنفذ ده شكله ايه؟
طبعا ربنا سبحانه وتعالى هو ملجأنا جميعا ومنفذنا وسندنا
ثم ممكن كتابة تطلعي فيها اللي كاتمك
ممكن شغل تحسي فيه بقيمتك
ممكن كتاب زرعة رياضة
أي حاجة تقوليلها “دي بتاعتي أنا” مش “بتاعتنا”
ليه بعيد عن الأشخاص؟
عشان الأشخاص بيتعبوا بيتغيروا بينسوا
ومش ذنبهم هم بشر
بس إنتى؟ إنتي مسؤولة عن نفسك
لو المنفذ بتاعك شخص هتتخنقي أول ما يبعد
ابدأي ازاي؟
بخطوة صغيرة أوي بس بتاعتك.
نص ساعة يوميا او على الأقل من أربع مرات لخمسة بالأسبوع
حاجة تعمليها وتقولي في الآخر “أنا عملت دي”
مع الوقت هتلاقي عندك عالم موازي عالمك إنتي
مش مطلوب منك تبقي جامدة ومش محتاجة حد
مطلوب منك تبقي قوية وعندك حتة بتاعتك
عشان لما الأشخاص يوجعوكي تلاقي منفذ تتنفسي منه اسمه “أنا”
اخلقي المنفذ ده قبل ما تتخنقي
—
