انتي كمان تستاهلي حنيتك
بقلم/ شمس فتحى
انتي كمان من الناس اللي تستاهل حنيتك انتي أول واحدة تستاهليها
طول عمرك بتعملي خاطر لكل الناس
خاطر للي زعلان وخاطر للي بعيد وخاطر للي عمره ما عمل حساب لخاطرك
بتطبطبي بتسامحي بتشيلي بتعدي وبتقولي معلش عشان المركب تمشي
بس المركب عمرها ما مشيت بيكي انتي
امتى اخر مرة عملتي لنفسك خاطر؟
امتى قولتي لنفسك “كفاية كده انا تعبت”؟
امتى حضنتي نفسك وقلتيلها شكراً انك مستحملة؟
امتى دلعتي روحك زي ما بتدلعي كل اللي حواليكي؟
اعملي لنفسك خاطر
مش أنانية والله ده حق
انتي كمان من الناس اللي تستاهل حنيتك
انتي أول واحدة تستاهلها
حنيتك اللي بتوزعيها على الدنيا كلها خدي منها حتة ليكي
اسمعي نفسك طبطبي عليها قولي لها لا لما تتوجعي وابعدي عن اللي بيأذيكي من غير ما تحسي بالذنب
اللي يحبك بجد هيعمل لخاطرك خاطر
واللي ما يعمل يبقى هو اللي خسر حنية قلبك
من النهاردة
اعملي لنفسك خاطر
البسي اللي بتحبيه كلي اللي نفسك فيه اضحكي بصوت عالي واقفلي الباب في وش أي حاجة بتطفيكي
انتي مش قليلة انتي كتير وكتير أوي كمان
وتستاهلي كل الحنية اللي في الدنيا واولها حنيتك انتي على نفسك
