إكتب كما أنت
كتبت/ شمس فتحى
دي رسالة لكل حد كاتم جواه
ومش عارف يطلع
عمرك جربت تكتب وإنت موجوع؟
مش عشان تبقى كاتب
عشان بس تطلع اللي جواك
علم النفس بيقولنا حاجة مهمة أوى
الكتابة التعبيرية بتعالج
بتقلل الزن اللي في دماغنا
بتخلينا نشوف مشاعرنا بوضوح
وبتساعدنا نلاقي معنى للحاجات
اللي بنمر بيها
مش لازم تبقى شاعر
أكبر غلطة بنعملها إننا
بنمسك الورقة ونقول
هكتب حاجة عميقة
فنسكت
لكن الحقيقة الكتابة مش
مطالبة تكون جميلة
ولا مرتبة ولا عميقة
ممكن تكتب أنا مخنوق
ومش عارف ليه
ممكن تشخبط
ممكن تكتب كلام ملخبط
المهم إنك كتبت
ليه بنكتب
عشان نفضي
الدماغ عاملة زي الموبايل لما 100 حاجة مفتوحة بيهنج
الكتابة بتقفل التطبيقات دي واحدة
بتخلينا نواجه مشاعرنا بدل ما نهرب منها
وبتورينا إن الوجع اللي حاسينه كبير أوي في دماغنا
لما بينزل على الورق بيبقى أصغر وأهدى
أعط لما بداخلك فرصة
أحياناً كل اللي محتاجينه
مش الكلمات المثالية
كل اللي محتاجينه إن اللي
جوانا يتحول كلمات
حتى لو الكلمات دي بايظة
حتى لو الجمل مش مترتبة
حتى لو بعد ما كتبت قطعت الورقة
المهم إنك إديت لقلبك مساحة يتكلم
فالمرة الجاية لما تحس
إنك مخنوق متدورش على
الكلام الحلو دور على ورقة وقلم
واكتب
اكتب كما أنت
عشان ساعات الشفاء بيبدأ بجملة واحدة متلخبطة
