بين إرضاء الناس والحفاظ على أنفسنا.. أين نقف؟

بين إرضاء الناس والحفاظ على أنفسنا.. أين نقف؟

صفاء مصطفى…..

أخطر ما نخسره ليس الأشخاص.. بل أنفسنا ونحن نحاول إرضاءهم

في وقت من الأوقات ممكن نفضل نحاول نرضي كل اللي حوالينا

نخاف نزعل ده ونخاف نخسر ده ونحسب كل كلمة قبل ما نقولها ونراجع كل موقف ألف مرة وأحيانا نسكت عن حاجات تضايقنا لمجرد إننا مش عايزين ندخل في مشكلة

ومع الوقت نكتشف إننا كنا بنحافظ على ناس كتير لكن في المقابل خسرنا نفسنا

الحقيقة إن إرضاء الناس طول الوقت شيء مستحيل مهما عملت ومهما قدمت هتلاقي شخص شايف إنك قصرت وشخص تاني مش عاجبه أسلوبك وشخص ثالث ممكن ينسى كل اللي عملته عشان موقف واحد ما عجبوش

وعشان كده لازم نتعلم إن مش كل شخص زعلان منك يبقى أنت غلطان ومش كل شخص ابتعد عنك يبقى أنت السبب ومش كل علاقة انتهت معناها إنك فشلت في الحفاظ عليها

أحيانا بنكون محتاجين نفهم إن بعض الناس وجودهم في حياتنا كان له وقت معين وانتهى

وده مش معناه إننا نكرههم أو نتمنى لهم الشر بالعكس ممكن نتمنى لهم الخير من بعيد لكن من غير ما نفضل ندفع من راحتنا وثقتنا بأنفسنا عشان نحافظ على علاقة لم تعد تشبهنا

أصعب حاجة إن الإنسان يوصل لمرحلة يبقى فيها طول الوقت بيسأل نفسه: هو أنا زعلت مين؟ هو أنا قلت إيه غلط؟ هو ليه فلان اتغير؟ هو ليه الشخص ده مبقاش زي الأول؟

وفي وسط كل الأسئلة دي ننسى نسأل السؤال الأهم:

أنا مرتاح؟

يمكن السؤال بسيط لكنه مهم جدا

لأننا أحيانا بنعيش سنوات كاملة نحاول نكون الصورة اللي الناس عايزاها وننسى إحنا أصلا عايزين نكون مين

نوافق على حاجات مش مقتنعين بيها ونقبل كلام يوجعنا ونضحك في وقت نفسنا نبكي ونقول “ولا يهمك” في الوقت اللي جواها ألف “ليه؟”

وبنبرر ده كله بكلمة واحدة: “مش عايز أخسر حد”

لكن الحقيقة إن خسارة نفسك أصعب من خسارة أي شخص.

الشخص اللي بيحبك بجد مش هيطلب منك طول الوقت إنك تتنازل عن نفسك عشانه

مش هيخليك تشك في قيمتك

مش هيستغل طيبتك

ومش هيخليك طول الوقت خايف من رد فعله

العلاقات الصحية مش معناها إننا عمرنا ما نختلف لكن معناها إن الاختلاف ما يتحولش لإهانة وإن العتاب ما يتحولش لعقاب وإن الحب ما يتحولش إلى سيطرة

وفيه فرق كبير بين إنك تكون إنسان متسامح وإنك تسمح للناس إنها تتجاوز حدودها معاك

التسامح شيء جميل لكن من غير حدود ممكن يتحول إلى استنزاف

والطيبة شيء عظيم لكن لما تكون من غير وعي ممكن تخلي بعض الناس يشوفوها فرصة للاستغلال

وعشان كده مش غلط إنك تقول “لا”

مش غلط إنك تبعد

مش غلط إنك تختار راحتك

ومش غلط إنك توقف تبرر نفسك لكل شخص

أحيانا الصمت مش ضعف والابتعاد مش غرور ووضع الحدود مش قسوة

أحيانا كل ده بيكون محاولة أخيرة منك إنك تحافظ على نفسك

وأنا مؤمنة إن الإنسان مش لازم يفضل طول الوقت يثبت إنه كويس

اللي يعرفك بجد هيعرفك من مواقفك مش من كلام الناس عنك

واللي قرر يفهمك غلط مهما شرحت له ممكن يفضل مصر على فهمه

وعشان كده مش كل معركة تستحق إنك تدخلها ومش كل كلمة تستحق رد ومش كل شخص يستحق إنك تستهلك طاقتك عشانه

الحياة أقصر من إننا نقضيها في محاولة إرضاء الجميع

إرضي ربنا وكن صادق مع نفسك واعمل اللي يرضيك طالما مش بتؤذي حد

وحافظ على قلبك لكن ما تقفلوش

سامح لكن ما تنساش الدرس

حب لكن ما تلغيش نفسك

ساعد لكن ما تسمحش لحد يستغل طيبتك

وابعد لما يكون البعد هو الحل من غير كراهية ومن غير رغبة في الانتقام

وفي النهاية يمكن أهم درس نتعلمه مع الوقت إن مش كل شخص بنخسره هو خسارة

أحيانا الشخص اللي خرج من حياتنا ترك مكانا فارغا في البداية لكن بعد فترة نكتشف إنه ترك لنا مساحة نرجع فيها لنفسنا

وساعتها نفهم إن أخطر شيء كان ممكن نخسره مش شخصا آخر…

كان ممكن نخسر نفسنا ونحن نحاول إرضاءه.