التفاصيل الصغيرة
كتبت /شمس فتحي
سر المودة الزوجية مش كلمات
حلوة بتتقال وخلاص
المودة الحقيقية اكبر من كده بكتير
المودة هي اهتمام صادق وقت ما الطرف التاني تعبان
هي احتواء وقت الضيق
هي اكلة حلوة بتجمع القلوب
قبل ما تجمع البطون
هي مشاركة في تفاصيل الحياة اليومية
وهي تلاوة للقرآن بتنزل السكينة والرحمة على البيت كله
البيوت السعيدة مش بتتبني
بالفلوس ولا بالكلام الكبير
البيوت السعيدة بتتبني بالتفاصيل
سؤال باهتمام.. “يومك كان عامل ازاي؟”
ابتسامة صادقة اول ما تشوفيه داخل من باب البيت
قعدة هادية من غير موبايلات ودوشة
مساعدة من غير ما التاني يطلب
اكلة على طبلية واحدة ولمة تضحك
وقرآن بيتقرأ في البيت يطرد اي هم
حاجات تبان بسيطة بس هي دي اللي بتحفظ الحب وتقوي العلاقة وتخليها تعيش
عايزين المحبة تفضل بينكم؟
يبقى اهتموا ببعض
كلوا مع بعض
اخرجوا اتمشوا ولو عشر دقايق
واحكوا لبعض
ساعدوا بعض في شغل البيت
وخلوا للقرآن نصيب ثابت كل
يوم في حياتكم
صدقوني التفاصيل الصغيرة
دي هي اللي بتصنع السعادة الكبيرة
