الحب لما بيبرد مش لما بيموت
كتبت/شمس فتحى
سؤال ستات كتير بتسأله وهي موجوعة: هو احنا بطلنا نحب بعض؟
لا انتوا مبطلتوش تحبوا بعض
انتوا بس نسيتوا تحبوا بعض ازاي
البرود العاطفي بييجي امتى؟
بييجي لما نتحول من اتنين بيحبوا بعض، لاتنين عايشين مع بعض وخلاص
بييجي لما كلامنا كله يبقى
هات ودي عملت فين الفلوس الولاد عملوا ومفيش مرة نقول “وحشتني، انت عامل ايه النهارده، انا مقدر تعبك
بييجي لما الزعل يتراكم
كلمة جارحة اتقالت وقت خناقة ومتطبطبش عليها
احتياج طلبته واتقالي “بعدين”
عتاب اتسكت عليه عشان
“مش عايزة مشاكل”
فكل حاجة اتدفنت جوا القلب وعملت طبقة وطبقة فوق طبقة لحد ما القلب بقى تقيل ومش عارف يحس زي الأول
طيب نعدي ده ازاي؟
وقفوا لوم وابدأوا سمع
مش مطلوب منك تحلي كل مشاكلك
في قعدة واحدة مطلوب بس ترجعي تسمعيه من غير ما تدافعي عن نفسك وهو يسمعك من غير ما يهاجمك
اسمعوا بعض كأنكم بتسمعوا بعض لأول مرة
ارجعوا للكلام الصغير
مش لازم كلام حب كبير كلمة “تسلم ايدك” “ربنا يخليك لينا” “شكلك حلو النهارده” الكلام الصغير ده هو اللي بيدفي البيت
وقت ليكم انتوا بس
حتى لو ربع ساعة في اليوم من غير موبايلات ومن غير كلام عن العيال والمصاريف اشربوا شاي سوا احكوا عن أي حاجة ارجعوا اتنين مخطوبين بيحاولوا يعرفوا بعض تاني
صلحوا القديم
فيه جرح قديم لسه واجعك؟
قولي بس مش بصيغة اتهام
قولي “انا اتوجعت يومها لما حصل كذا ولسه شايلاه جوايا” الاحتواء بيعالج اكتر من العتاب
الاهتمام فعل مش كلام
العلاقة مش بتعيش بالحب بس بتعيش بالتقدير لما يعمل حاجة صغيرة قدريها ولما تعملي حاجة استني منه يقدرها التقدير هو بنزين الحب
اللى محتاجينه مش حب جديد
احنا محتاجين ننفض التراب من على الحب القديم اللي لسه موجود
ارجعوا تطبطبوا على بعض قبل ما المسافة تكبر أكتر من اللازم
