إفهم زوجتك
كتبت/ شمس فتحى
الراجل الجدع مش اللي
صوته عالي في البيت
الراجل الجدع هو اللي فاهم
إمتى مراته محتاجة حضن
وإمتى محتاجة كلمة
زوجتك لما تغضب منك
متردش العصبية بعصبية
قرب واحضنها
الغضب بتاعها مش حرب ده رسالة بتقولك “انا متضايقة من البعد”
زوجتك لما تسكت
متقولش “سيبيها براحتها”
اسألها مالك؟ في ايه تاعبك؟
سكوتها مش راحة سكوتها بحر جواه كلام كتير
زوجتك لما تتجاهلك
دي مش قلة أصل منها دي بتستنجد
اديها إهتمام إسمعها بص في عينها
الست لما بتحس إنها مش مرئية
بتموت بالبطيء
زوجتك لما تقول عايزة أبعد
إوعى تقولها “براحتك”
إمسك إيدها قولها إحنا هنحل سوا
البعد عندها اختبار بتشوف هتتمسك بيها ولا هتسيبها
زوجتك في أسوأ حالاتها
شعرها ملخبط وتعبانة ومش طايقة نفسها
هي دي اللحظة اللي لازم تقولها فيها “إنتي جميلة”
كلمتك دي بتديها ثقة الدنيا كلها
زوجتك لما تعيط
متقولش “بطلي دراما”
بوس رأسها وطبطب عليها
وقولها “أنا جنبك وبحبك أوي”
دموعها غالية أوعى تستهتر بيها
زوجتك لما تغير عليك
متتخنقش وتقول نكد
إعرف إن غيرتها دي مقياس حب
بمعنى إنها شايفاك بتاعها
ومش عايزة حد يشاركها فيك
خليك فاكر
الست لو كانت طير كانت هتبقى طاووس بجمالها
ولو كانت حيوان كانت هتبقى
غزالة برقتها
ولو كانت حشرة كانت هتبقى
فراشة بخفتها
لكن ربنا كرمها وخلقها بني آدمة
فبقت السند والحضن والأمان
بقت الحبيبة اللي بتهون
والزوجة اللي بتشيل
والأم اللي بتربي أجيال
ربنا مقالش إنها جايزة في الجنة بالصدفة
لأنها فعلا نعمة عظيمة تستاهل التقدير
شكرا لكل راجل فاهم يعني إيه
“مودة ورحمة”
ويستاهل يبقى سند بجد
